नवी दिल्ली : ‘वाढत्या प्रदूषणाला आळा घालण्यात आणि जीवाश्म इंधनावरील देशाची अवलंबिता कमी करण्यात विद्युत वाहनांचा मोठ्या प्रमाणावर स्वीकार महत्त्वाची भूमिका बजावेल,’ असे मत केंद्रीय रस्ते वाहतूक आणि महामार्ग मंत्री नितीन गडकरी यांनी व्यक्त केले. भारतात जोडणी झालेली ‘एमजी झेडएस ईव्ही’ ही पहिली संपूर्ण इलेक्ट्रिक इंटरनेट एसयूव्ही नवी दिल्ली येथे सादर करण्यात आली. त्या वेळी ते बोलत होते. ही नवी अत्याधुनिक एसयूव्ही गडकरी यांनी स्वतः चालवून पाहिली.
‘एमजी मोटार इंडियासारख्या खासगी कंपन्या देशात इलेक्ट्रिक वाहनांचे चलन वाढवण्याच्या भारत सरकारच्या प्रयत्नांना मदत करीत आहेत ही चांगली बाब आहे,’ असे त्यांनी या वेळी नमूद केले.
एमजी (मॉरिस गॅरेज) मोटार इंडियाने ‘झेडएस ईव्ही’ ही पहिली संपूर्ण इलेक्ट्रिक इंटरनेट एसयूव्ही दाखल केली आहे. भारतातील ही पहिली संपूर्ण इलेक्ट्रिक इंटरनेट एसयूव्ही असल्याचा कंपनीचा दावा आहे. ‘झेडएस ईव्ही’ ग्राहकांच्या गरजा भागवण्यासाठी आपल्या मल्टी स्टेप चार्जिंग इकोसिस्टमच्या उभारणीसाठी एमजी मोटार इंडियाने विविध जागतिक आणि स्थानिक कंपन्यांशी भागीदारी केली आहे. प्रत्येक झेडएस ईव्हीसोबत एक ऑन बोर्ड केबल असते, ज्याने कोठेही चार्जिंग करता येऊ शकते, तर एसी फास्ट चार्जरद्वारे घरी, कार्यालयातही चार्जिंग करता येते.
ही कंपनी काही निवडक एमजी शोरूम्सवर एक डीसी सुपर-फास्ट चार्जिंग नेटवर्कदेखील उभारत असून, निवडक सॅटेलाइट शहरांत मुख्य मार्गावर एमजी डीलरशिप्समध्ये एक विस्तारित चार्जिंग नेटवर्क तयार करण्याची त्यांची योजना आहे. सुपर-फास्ट डीसी चार्जर्समार्फत (५० केडब्ल्यू) ‘झेडएस ईव्ही’ची बॅटरी ५० मिनिटांत ८० टक्के चार्ज होऊ शकते, तर घरी बसवलेल्या एसी फास्ट चार्जर्सद्वारे पूर्ण चार्जिंग करण्यासाठी सहा ते आठ तास लागू शकतात.
